كلمات اغنية حكاية وطن

حكاية وطن مرة عيطلي بيي وقللي قرب يا ولد ، بدي فهمك شويي عن مشاكل البلد وخبرني انو جدي مرة عيطلو كمان ، وقلو قرب لحدي بدي خبرك عن لبنان من زمان كتير كتير الله خلق هالاكوان ،وخلق هالبلد الصغير ونقالو اسم لبنان كان جوه متل السحر وكانت رجال رجالو ، شو كان نظيف البحر يغسل اجرين جبالو كانت العيشة حلوة والرزقة يا ماشاءالله ، وكروم العنب بلوة وتفاحا هيك اسمالله يرمي الشبكة هالصياد تطلع مليانة الشبكة ، ما تخلص منو الاعياد الطقش الفقش والدبكة وكتر ما تغرد الطيور تصير اصواتا مبحوحة ، والناس تنام بهالليل تاركي بوابا مفتوحة صداقة حب وامان محبة نشاط وحركة ، كان طيب الانسان ماشي وعايش عالبركة توفى جدي هالمسكين وما كفالو الخبرية ، ومرقت هالخبرية سنين وكفالي ياها بيي قللي فجأة متل البرق صار بلد الازدهار ، اسمو صار سويسرا الشرق ليلو مضوي متل النهار هالجايي وهللي رايح ليقضي سهرات الكيف ، يجي لعنا السايح ويبقى لآخر الصيف العرق والكبة النية التبولة والقطايف ، عيشة حلوة وهنية لا اديان وطوايف ونتشاوف نحنا من هون وهيدي لالنا البيوت ، ما ضل مطرب بهالكون الا وغنى لبيروت بيروت يا العيش الهني بيروت يا ست الدني ، بيروت يا مهد الحضارة شارع سرسرق والمنارة بيروت امنا الحنونة عالروشة وعالزيتونة ، وكتر ما غنوا لبيروت طرقوها صيبة عين ما عادت تعرف بيروت القذايف عم تجي منين ، يقعد حسن وبشارة مع بعض عخطوط التماس فنجان قهوة وسيجارة يتسلوا ويحكوا عالناس ، ولم يعطوهن اشارة يبلشوا عبعضن قواس صفّا في عندو بيتين بيملكهن كل لبناني ، بيتو الاول مدري وين والملجأ بيتو التاني وعالم صفت بلا بيوت لا تاني ولا اولاني ، وناس ايدو التوطين وناس احتجوا وقالوا لأ وما تعرف الحق عمين وليش البلد هيك انشق ، والحكام المرتشيين يحطوا عغيرن الحق جوا جيابن ملهيين ونحنا عم ناكل الدق ، ودخل بيناتنا الغريب وداهمتنا اسرائيل هيدا خيي وهيه حبيب وهيدا صهر وهيه عديل ، المهم خربوا البلاد والامل صفّا قليل بمية دولار البنزين تحصل منو شي قليل ، ولتحصل على الخبزات ساعة بالصف الطويل رجال ونسوان بهالصف بالشوبات وبالبرد ، واحد يخرقلك الصف عخصرو حامل فرد عايام جدك يا ابني بوابنا تضللا مشروعة ، عايامي بعدا هيك بس هالمرة مخلوعة ما بنسا هالخبرية وما بنسا بهاك اليوم ، طفا السيجارة بيي وقللي انا فايت عالنوم بعد مدة طويلة اندهت لابني عشية ، لخبرو عالقليلة اللي خيرني ياهن بيي قلتلو وقف المدفع ما عرفنا كيف ولا لاي ، ولمن وقفوا المدفع دغري قعدونا عليه تغلغل الطفر فينا ورافقتنا المصايب ، حد ادنى ما بيكفينا فوقو مندفع ضرايب وخبرية المدارس هاي خبرية بريق الزيت ، ابنك ليصفي دارس بدك قبل تبيع البيت الشعب عامل كريزا والحلم صفّا فيزا ، بتمنى بكرا يا ابني تكفي القصة لابنك كمان ما تكفيها بكندا كفيها هون ... بلبنان